ಜೀಟಾಕ್ ಗೆಳತಿ : ಬದುಕಿ ಬಂದಾಗ - ಭಾಗ ೮

ಅವಳ ಲಾಗ್ ಆನ್ ಪ್ರತೀಕ್ಷೆಯಲ್ಲಿಯೇ ಇದ್ದ ನಾನು ಅವಳು ಬರುತ್ತಿದ್ದಂತೆ ಉದ್ವೇಗದಿಂದ ಚಾಟ್ ವಿಂಡೋ ತೆರೆದು ಹಾಯ್ ಎಂದು ಟೈಪಿಸಿದೆ. ಆದರೂ ಎಂಟರ್ ಬಟನ್ ಒತ್ತದೆ ಅವಳೇ ಪಿಂಗ್ ಮಾಡಲಿ ಎಂದು ನಿರೀಕ್ಷಿಸಿ ಮಾನಿಟರಿನ ತುದಿಯನ್ನೇ ಎವೆಯಿಕ್ಕದೆ ನೋಡುತ್ತಿದ್ದೆ. ಐದು ಹತ್ತು ಹದಿನೈದು ನಿಮಿಷ ಕಳೆದರೂ ಅವಳು ಪಿಂಗ್ ಮಾಡಲ್ಲಿಲ್ಲ. ನಾನೇ ಮುಂದುವರಿದು ಹಾಯ್ ಮಾತಾಡೋಕೆ ಇಷ್ಟ ಇಲ್ಲವಾ? ಎಂದು ಕಳಿಸಿದೆ. ಅವಳು - ಹಾಯ್ ಸಾರಿ ನಾನು ಬೃಂದಾ. ಈಗ ಸ್ವಲ್ಪ ಬ್ಯುಸಿ ಇದ್ದೀನಿ. ಪ್ಲೀಸ್ ಏನು ತಿಳ್ಕೊಬೇಡ ನಾನೇ ನಿಂಗೆ ರಾತ್ರಿ ಕಾಲ್ ಮಾಡ್ತೀನಿ. ಪ್ಲೀಸ್ ಪ್ಲೀಸ್ ಓಕೆ. ಸಾರಿ ಅಗೈನ್ ಟಾಟಾ. ನಾನು ಪ್ರಿಯಾಳಿಗೆ (ಅನ್ನೋನಿಗೆ) ಏನಾಗಿದೆ ಎಂದು ಟೈಪಿಸುತ್ತಿರುವಾಗಲೇ  ಬೃಂದಾ ಲಾಗ್ ಆಫ್ ಆಗಿಬಿಟ್ಟಳು. ನಾನು ತಕ್ಷಣವೇ ಅನ್ನೋನ್ ನಂಬರಿಗೆ ಕರೆ ಮಾಡಿದೆ. ಆದರೆ ಅದು ಸ್ವಿಚ್ ಆಫ್ ಆಗಿತ್ತು.

ರಾತ್ರಿ ಕರೆ ಮಾಡುತ್ತೇನೆಂದು ಅನ್ನೋನ್ ಹೇಳಿದ್ದರೆ ನಾನು ನಂಬುತ್ತಿರಲ್ಲಿಲ್ಲವೇನೋ? ಆದರೆ ಬೃಂದಾ ಹೇಳಿದ್ದರಿಂದ ನಾನು ನಂಬಿದ್ದೆ. ಹಾಗಾಗಿ ಕಳೆದೊಂದು ವಾರದಿಂದ ಈ ಅನ್ನೋನಿನ ಬಗೆಗಿದ್ದ ಸಂದೇಹಗಳೆಲ್ಲ ಇವತ್ತು ರಾತ್ರಿ ನನಗೆ ತಿಳಿದುಹೋಗತ್ತೆ. ಇನ್ನು ರಾತ್ರಿಯವರೆಗಾದರೂ ಈ ಅನ್ನೋನ್ ಅನ್ನು ಮನಸಿನಿಂದ ಆಚೆ ಓಡಿಸಲು ನಿರ್ಧರಿಸಿದೆ. ಸಮಯ ೩:೧೩ ಆಗಿತ್ತು. ಜಯನಗರದ ಸ್ವಾಗತ್ ಗರುಡ ಮಾಲಿನಲ್ಲಿರುವ ಐನಾಕ್ಸ ಚಿತ್ರಮಂದಿರಕ್ಕೆ ಕರೆ ಮಾಡಿ ೪:೧೫ ಶುರು ಆಗುವ ಪಂಚರಂಗಿ ಚಿತ್ರಕ್ಕೆ ಚೀಟಿ ಸಿಗುತ್ತದೆಯ ವಿಚಾರಿಸಿಕೊಂಡೆ.
ಸಂಯುಕ್ತಗೆ ಕರೆ ಮಾಡಿ : ಏನೇ ಮಾಡ್ತಿದ್ಯ?
ಸಂ : (ಆಕಳಿಸುತ್ತಾ) ಊಟ ಮಾಡಿ ಮಲಗಿದ್ದೆ. ಈಗ ಏಳ್ತಾ ಇದ್ದೀನಿ.
ನಾ : ಏನ್ ಮಾಡಬೇಕು ಅಂತ ಇದ್ದೀಯ ಈಗ? ಸಂಜೆಗೆ ಎಲ್ಲಾದರು ಹೋಗೋ  ಪ್ಲಾನ್ ಇದ್ಯ ?
ಸಂ : ಏನು ಇಲ್ಲ.. ನಿನ್ನೆ ನೀನ್ ಕೊಟ್ಟಿರೋ ಮನೆ ಪಾಠದ ಲೆಕ್ಕಗಳನ್ನು ಮಾಡಬೇಕು.
ನಾ : ಸರಿ.. ಇವತ್ತು ಮನೆ ಪಾಠ ಬೇಡ. ಈಗಲೇ ರೆಡಿ ಆಗಿ ಜಯನಗರದ ಸ್ವಾಗತ್ ಗರುಡಾಗೆ ಬಾ.. ಪಂಚರಂಗಿ ಸಿನಿಮಾ ನೋಡೋಣ ...
ಸಂ : ಉಮ್ಮ ಉಮ್ಮ ಉಮ್ಮ ... ಸೊ ಸ್ವೀಟ್ ಆಫ್ ಯು.
ನಾ : ಸರಿ ಸರಿ . .. ಆಮೇಲೆ ...
ಸಂ : ಅಮ್ಮನಿಗೆ ನಿಜ ಹೇಳಲೋ ? ಸುಳ್ಳು ಹೇಳಲೋ?
ನಾ : ನಿಜಾನೆ ಹೇಳು.
ಸಂ : ನಂ ಫ್ರೆಂಡ್ಸ್ ಜೊತೆ ಹೋಗ್ತೀನಿ ಅಂದ್ರು ಬೇಡ ಅಂತಾರೆ ಆದ್ರೆ ನಿನ್ ಜೊತೆ ಅಂದ್ರೆ ಅಮ್ಮ ಏನ್ ಬೇಡ ಅನ್ನಲ್ಲ
ನಾ : ಲೇ ಹೇಳೋದನ್ನ ಕೇಳುಸ್ಕೋ .. ಅತೀ ಬುದ್ದಿವಂತಿಕೆ ಉಪಯೋಗಿಸಿ ರಾತ್ರಿ ಊಟಕ್ಕೆ ಬರೋದಿಲ್ಲ ಅಂತ ಹೇಳಿ ಬರಬೇಡ. ಅಮ್ಮ ಏನ್ ಮಾಡ್ಬೇಕು ಅಂತ ಇದಾರೋ ಅದುನ್ನೇ ಸ್ವಲ್ಪ ಜಾಸ್ತಿ ಮಾಡೋಕೆ ಹೇಳು. ನಾನು ಅಲ್ಲೇ ಊಟ ಮಾಡ್ತೀನಿ. ಮನೆಗ್ ಬಂದು ಅಡಿಗೆ ಮಾಡ್ಕೊಳೋದಕ್ಕೆ ಬೇಜಾರು.
ಸಂ:  ಸರಿ ಆಯ್ತು .. ಹೇಳ್ತೀನಿ. ನಾನ್ ಈಗಲೇ ಹೊರುಡ್ಲಾ?
ನಾ : ಹು.. ಈಗ್ಲೇ ಹೊರಡು .. ೪:೧೫ ಕ್ಕೆ ಇರದು. ಟಾಟಾ
ಸಂ : ಸರಿ .. ಸೀ ಯು
ಮತ್ತೆ ಐನಾಕ್ಸ ಚಿತ್ರಮಂದಿರಕ್ಕೆ ಕರೆ ಮಾಡಿ ೨ ಚೀಟಿ ಕಾದಿರಿಸಲು ಸೂಚಿಸಿದೆ.

ನಾನು ಗಾಡಿ ಪಾರ್ಕ್ ಮಾಡಿ ಮಾಲಿನ ಮುಂಭಾಗಕ್ಕೆ ಬಂದಾಗ ಸಂಯುಕ್ತ ಆಟೋಯಿಂದ ಇಳಿದು, ಆಟೋದವನ ಹತ್ತಿರ ಏನೋ ಚೌಕಾಶಿ ನಡೆಸುತ್ತಿದ್ದಳು. ಇನ್ನು ಅಲ್ಲಿಗೆ ಹೋದರೆ, ನಾನ್ ಉಳುಸ್ಕೋಳೋ ಹತ್ತ್ ರೂಪಾಯಿ ಮೇಲು ನಿನಗ್ಯಾಕೆ ಕಣ್ಣು ? ಅಂತ ಅವಳ ಹತ್ತಿರ ಬೈಸ್ಕೊಳೋದು ಬೇಡ ಅನಿಸಿ ದೂರದಲ್ಲೇ ಅವಳನ್ನು ನೋಡುತ್ತಾ ನಿಂತೆ. ಆಟೋದವನ ವಿರುದ್ದದ ಯುದ್ದದಲ್ಲಿ ಅವಳೇ ಗೆದ್ದಳೆಂದು ಕಾಣತ್ತೆ... ಒಳಗೊಳಗೇ ಮುಸಿನಗುತ್ತಾ ನನ್ನ ಕಡೆ ಕೈಮಾಡಿ ಅಲ್ಲೇ ಬಂದೆ ಎನ್ನುತ್ತಾ ಓಡಿ ಬಂದಳು. ಬಂದವಳೇ ನನ್ನ ಎಡಗೈ ಅನ್ನು ಜಗ್ಗಿ ಅದಕ್ಕೆ ಜೋತುಬಿದ್ದು I cant believe it ನಾನ್ ಅಷ್ಟ್ ಸತಿ ಕರ್ಕೊಂಡು ಹೋಗು ಅಂದ್ರು ಇಲ್ಲ ಅಂದವನು ಇವತ್ತು ಇದ್ದಕ್ಕಿದ್ದ ಹಾಗೆ... ನಿನ್ನ ಅರ್ಥ ಮಾಡ್ಕೋಳೋಕೆ ಆಗ್ತಿಲ್ಲ. ಸರಿ.. ನೀನ್ ಏನ್ ಅರ್ಥ ಮಾಡ್ಕೋಬೇಡ.. ಸದ್ಯಕ್ಕೆ ನನ್ ಕೈಮೇಲ್ ಹಾಕಿರೋ ನಿನ್ ಬಾಡಿ ಭಾರಾನ ತೆಗೆದು ಬರಿ ಕೈ ಮಾತ್ರ ಹಿಡ್ಕೋ ಅಂದೆ. ಸಾರಿ ಅಂದವಳೇ stairs ಲಿ ಹೋಗೋಣ lift  ಬೇಡ ಅಂದಳು. ಇನ್ನು ಲಿಫ್ಟಿನ ಭಯ ಹೋಗಿಲ್ವ ನಿಂಗೆ? ನೀನ್ ಹತ್ಕೊಂಡು ಬಾ ನಾನ್ ಲಿಫ್ಟ್ ಲೇ ಬರ್ತೀನಿ ಅಂತ ಅವಳ ಕೈಬಿಟ್ಟು ಆ ಕಡೆ ಹೋಗುವವನ ಹಾಗೆ ನಟಿಸಿದೆ.  ಉಹು ಉಹು ಪ್ಲೀಸ್ ಕಣೋ ಅಂದ್ಲು.. ಅವೆಲ್ಲ ಆಗಕಿಲ್ಲ ಬೇಕಾದ್ರೆ ಲಿಫ್ಟ್ ಅಲ್ಲೇ ಬಾ.. ಕಣ್ಮುಚ್ಕೊಂಡು ಇರು. ಸರಿ ಅಂತ ಮತ್ತೆ ನನ್ನ ಕೈ ಹಿಡಿದು ಲಿಫ್ಟ್ ತನಕ ಬಂದು ಬಟನ್ ಅಮುಕಿದೆವು. ಲಿಫ್ಟ್ ಬಂದು ತೆರೆದು ನಿಂತಿತು. ಅವಳು ಕಣ್ಣು ಮುಚ್ಚಿ ಒಳ ಹೋದರೂ ನಾನು ಆಚೆ ನಿಂತಿದ್ದೆ. ಲಿಫ್ಟಿನ ಬಾಗಿಲು ಇನ್ನೇನು ಕ್ಲೋಸ್ ಆಗಬೇಕು ಅಷ್ಟರಲ್ಲಿ ಅವಳನ್ನು ಹೊರಗೆಳೆದುಕೊಂಡು ಇಬ್ಬರು ಕೈ ಕೈ ಹಿಡಿದು stairs ಹತ್ತುತ್ತಾ ಟಿಕೆಟ್ ಕೌಂಟರ್ ಸಮೀಪ ಬಂದೆವು.

ಸಮಯ ೪  ಗಂಟೆಯಾಗಿತ್ತು. ಸಿನೆಮಾ ಶುರುವಾಗಲು ಇನ್ನು ೧೫ ನಿಮಿಷ ಇದೆ. ಯಾರನ್ನು ಒಳಬಿಡುತ್ತಿರಲ್ಲಿಲ್ಲ. ನಾನು ಟಿಕೆಟ್ ಕೌಂಟರ್ ಬಳಿ ತೆರಳಿ ಟಿಕೆಟ್ ಪಡೆದು ಹಿಂತಿರುಗಿದಾಗ, ಸಂಯುಕ್ತಳ ಕಣ್ಣು ಅಲ್ಲೇ ಎದುರಿಗಿದ್ದ ಚಪ್ಪಲಿ ಅಂಗಡಿಯೆಡೆಗೆ ನೆಟ್ಟಿತ್ತು. ಇನ್ನು ಅವಳ ಹತ್ತಿರ ನಿಂತರೆ ಜೇಬಿಗೆ ೪೦೦-೫೦೦ಕ್ಕೆ ಮೋಸವಿಲ್ಲದೆ ಕತ್ತರಿ ಗ್ಯಾರಂಟಿ ಅನಿಸಿ, ಅವಳ ಬಳಿ ಹೋಗಿ ಟಿಕೆಟ್ ಕೊಟ್ಟು ಇಟ್ಕೊಂದಿರು, ಅಲ್ಲಿ ನನ್ನ ಫ್ರೆಂಡ್ ನ ಮಾತಡುಸ್ಕೊಂಡು ಬರ್ತೀನಿ ಅನ್ನುತ್ತಾ, ಅವಳ ಪ್ರತಿಕ್ರಿಯೆಗೆ ಕಾಯದೆ ಅತ್ತ ಕಡೆ ತಿರುಗಿ ಯಾರೋ ಗೊತ್ತಿಲ್ಲದವರ ಕಡೆ ಸುಮ್ಮನೆ ಕೈ ಬೀಸುತ್ತಾ ಪರಾರಿಯಾದೆ. ಕೆಳಗೆ ರೆಸ್ಟ್ ರೂಮಿಗೆ ಹೋಗಿ ನಾನು ಬರೋಷ್ಟರಲ್ಲಿ ಜನಗಳನ್ನು ಒಳಬಿಡುತ್ತಿದ್ದುದರಿಂದ, ಸಂಯುಕ್ತ ಗಲಿಬಿಲಿಯಾದವಳಂತೆ ಆ ಕಡೆ ಈ ಕಡೆ ತಿರುಗಿ ನಾನು ಕಾಣುತ್ತಿದ್ದೆನಾ? ನೋಡುತ್ತಿದ್ದಳು. ನಾನು ಕಂಡೊಡನೆ ಕೈಬೀಸಿ ಬೇಗ ಬಾ ಬೇಗ ಬಾ ಅನ್ನುತ್ತಾ ಜೋರಾಗಿ ಕೈಬೀಸಿ ಕರೆದಳು. ನಾನು ಹತ್ತಿರ ಹೋದೊಡನೆ ಚಪ್ಪಲಿ ಕೊಡ್ಸು ಅಂತೀನಿ ಅಂತ ತಪ್ಪುಸ್ಕೊಂಡ್ ಹೋಗ್ತ್ಯಾ? ಅಂದು ಸೊಂಟಕ್ಕೆ ಮೆಲ್ಲನೆ ಗಿಂಟಿದಳು.

ಇಡೀ ಸಿನಿಮಾವನ್ನು ನನ್ನ ಭುಜದ ಮೇಲೆ ತಲೆ ಇಟ್ಟುಕೊಂಡು ನೋಡಿದಳು ಸಂಯುಕ್ತ. ಲೈಫು ಇಷ್ಟೇನೆ ಹಾಡು ಬಂದಾಗ ಗಟ್ಟಿಯಾಗಿ ನನ್ನ ಕೈಗಳನ್ನು ಹಿಡಿದ್ದಿದ್ದಳು. ನಿನ್ನಯ ನಲುಮೆಯ ಲೋಕಕೆ ಹಾಡು ಮುಗಿದಾದ ಮೇಲೆ ನನ್ನ ಕಿವಿಯಲ್ಲಿ ನನ್ನನೇ ಪ್ರೀತಿಸು ಅಂದಳು.  ಅದಕ್ಕೆ ನಾನು ಉಡಿಸುವೆ ಬೆಳಕಿನ ಸೀರೆಯ ಹಾಡಿನ 'ಸದ್ದಿಲ್ಲದಾ ಈ ಅಲೆಯ ಈ ಸೆಳೆತಾ...ಕಾಣಿಸದೂ... ನನ್ನಾ ಸಹಿಸು...ಹೃದಯದ ಸಂಗಡ ನೋವು ಸಹಾ ಉಚಿತವಿದೆ' ಎಂದೆ. ಇನ್ನು ನೀನ್ ಅಮಲಳ ಗುಂಗಿಂದ ಹೊರಬಂದಿಲ್ಲ.. ಹಳೇ ಗರ್ಲ್ / ಬಾಯ್ ಫ್ರೆಂಡ್ ನ ಬರೇ ಪಾಸ್ ವರ್ಡ್ ಲಿ ಇಟ್ಕೊಬೇಕು ಕಣೆ ಅಂತ ಹೇಳ್ತ್ಯ ಆದ್ರೆ ನೀನೆ ಇನ್ನು ಅವಳ್ನ ಮನಸಿನಲಿ ಇಟ್ಕೊಂದಿದ್ಯ, ಹೋಗೋ ನಂಗೆ ಬೇಜಾರ್ ಆಗತ್ತೆ ಅಂದ್ಲು. ಬರೇ ಪಾಸ್ ವರ್ಡ್ ಲಿ ಎನಿಕ್ ಇಟ್ಕೋಳೋದು ಗೊತ್ತಾ? ಪ್ರತಿಸಲಿ ಆ ಪಾಸ್ ವರ್ಡ್ ಕುಟ್ಟೋವಾಗ ಅವರ ಜೊತೆ ನಾವು ಕಳೆದ ಮಧುರ ಕ್ಷಣಗಳನ್ನ ನೆನೆಯೋಕೆ. ಅವರಾಡಿದ್ದ ಒಂದೊಂದು ಮಾತನ್ನು ನೆನೆಯೋಕೆ. ಅವಳು ಹ ಹ ಹ ಎಂದು ನಕ್ಕಾಗ, ನಿನಗಿದೆಲ್ಲ ಈಗ ಅರ್ಥ ಆಗೋಲ್ಲ ನಾನು ಕೈ ಕೊಡ್ತೀನಲ ಆಗ ಗೊತ್ತಾಗತ್ತೆ ಅಂದೇ. ನೀನ್ ಕೈಕೊಟ್ರೆ ನಾನು ಕಾಲ್ ಕತ್ರುಸ್ತೀನಿ ಅಂದ್ಲು.
[ಅಮಲಳ ಬಗ್ಗೆ ಹೆಚ್ಚು ತಿಳಿದುಕೊಳ್ಳಬೇಕೆಂದರೆ ನಾನು ಹಿಂದೆ ಬರೆದ್ದಿದ್ದ "ಅವಳ ಕಾಲ್ ಬರುತ್ತಾ?" ಧಾರವಾಹಿಯನ್ನು ನನ್ನ ಬ್ಲಾಗಿನಲ್ಲಿ ಓದಿ ]

ಸಿನೆಮಾ ಮುಗಿದಮೇಲೆ ಅವಳನ್ನು ಆ ಟಿಕೆಟ್ ಕೌಂಟರ್ ಎದುರಿದ್ದ ಚಪ್ಪಲಿ ಅಂಗಡಿಗೆ ಕರೆದೊಯ್ದೆ. ಅವಳಿಗೆ ಇಷ್ಟವಾದ ೩೯೦ ರೂಪಾಯಿಯ ಒಂದು ಜೊತೆ ಚಪ್ಪಲಿ ಕೊಡಿಸಿದೆ. ಹೊರಬಂದಾಗ ಮಳೆ ಜಿನುಗುತ್ತಿತ್ತು. ಮಳೆ ಬರುತ್ತಿರುವಾಗ ಐಸ್ ಕ್ರೀಮ್ ತಿನ್ನಲು ಸಂಯುಕ್ತಳಿಗೂ ಅಷ್ಟೇ ಏಕೆ ನನಗು ಇಷ್ಟಾನೆ, ಹಾಗಾಗಿ ಆ ಮಳೆಯಲ್ಲೇ ನಾವು ನಮ್ಮ MTR ಗೆ  ಹೋದೆವು. Hot chacolate fudge ಅವಳಿಗೆ ಇಷ್ಟವಾದ ಐಸ್ ಕ್ರೀಮ್. ಇಬ್ಬರೂ ಅದನ್ನೇ order ಮಾಡಿದೆವು. ಇನ್ನೇನು ತಿಂದದ್ದು ಮುಗಿಯಿತು ಅನ್ನಬೇಕಾದರೆ ಸಂಯುಕ್ತ ನನ್ನನ್ನೇ ದಿಟ್ಟಿಸುತ್ತಾ ನನ್ನ ಕಂಡರೆ ನಿನಗೆ ಇಷ್ಟ ಆದರೂ ಅದನ್ನ ಬಾಯಿ ಬಿಟ್ಟು ನನ್ನ ಹತ್ತಿರ ಹೇಳೋಲ್ಲ ಯಾಕೋ ಹೀಗ್ ಮಾಡ್ತ್ಯ ನೀನು? atleast ಒಂದ್ ಸತಿನಾದ್ರು ಹೇಳೋ I Love You ಅಂತ ಅಂತ ಗೋಗರೆದಳು. ಸಂಯುಕ್ತ please try to understand. ಹೌದು ನಿನ್ನ ಕಂಡರೆ ನಂಗೆ ಇಷ್ಟಾನೆ ಆದ್ರೆ ಇಷ್ಟು ಬೇಗಾನೆ ನಾನು ಕಮಿಟ್ ಆಗೋಕೆ ಸಾಧ್ಯ ಇಲ್ಲ. ಎನಿಕ್ಕೆ ಅಂತ ನಿಂಗು ಚೆನ್ನಾಗಿ ಗೊತ್ತು.

ಮನೆಗೆ ಬಂದಾಗ ಎಂಟು ಗಂಟೆಯಾಗಿತ್ತು. ಬಟ್ಟೆ ಬದಲಿಸಿ ಮುಖ ತೊಳೆದು ಸಂಯುಕ್ತಳ ಮನೆಗೆ ಊಟಕ್ಕೆ ಹೋದೆ. ಶಾಮರಾಯರು ನ್ಯೂಸ್ ಚಾನಲ್ ಗಳನ್ನು ವಾಶಿಂಗ್ ಮಿಶಿನ್ ತಿರುಗಿದಂತೆ ಹಿಂದಿನಿಂದ ಮುಂದಕ್ಕೆ ಮುಂದಿನಿಂದ ಹಿಂದಕ್ಕೆ ರಿಮೋಟ್ ಹಿಡಿದು ಬದಲಿಸುತ್ತಾ ಕೂತಿದ್ದರು. ಉತ್ತರ ಪ್ರದೇಶದ ಅಸೆಂಬ್ಲಿ ಚುನಾವಣೆ ಹಾಗು ಭಾರತ ಆಸ್ಟ್ರೇಲಿಯ ವಿರುದ್ದ ಟೆಸ್ಟ್ ಪಂದ್ಯ ಸೋತಿರುವ ಸುದ್ದಿಯೇ ಎಲ್ಲಾ ಚಾನಲ್ ಗಳಲ್ಲೂ ಬಿತ್ತರವಾಗುತ್ತಿತ್ತು. ಆಗಲೇ ಬರೆದದ್ದು ಕೆಳಗಿನ ಎರಡು ಚುಟುಕುಗಳನ್ನು :

ಪಾಂಟಿಂಗ್ ಹಸ್ಸಿ ಬ್ಯಾಟಿಂಗ್ ಭರ್ಜರಿ
ಕಪ್ತಾನ ಕ್ಲಾರ್ಕ್ ಗಂತೂ ತ್ರಿಶತಕದ ಗರಿ
ಸಿಡ್ನೀ ಮೈದಾನದಲ್ಲಿ ಸಚಿನ್ ರದು ೨೨೧ ಸರಾಸರಿ
ಆದರೂ ಬಾರಿಸಲಾಗಲ್ಲಿಲ್ಲ ನೂರನೇ ಸೆಂಚೂರಿ
ಲಕ್ಷ್ಮಣ್ ದ್ರಾವಿಡ್ ಮೇಲಿತ್ತು ಭರವಸೆ ಮಿತಿ ಮೀರಿ
ಕೊಹ್ಲಿ ಧೋನಿ ಅಂತೂ ಲೆಕ್ಕಕ್ಕೆ ಇರ್ಲ್ಲಿಲ್ಲಾರಿ
ಅಶ್ವಿನ ಒಬ್ಬನೇ ಮುಟ್ಟಿಸಲಾಗಲ್ಲಿಲ್ಲ ಬೃಹತ್ ಗುರಿ
ವಿದೇಶಿ ನೆಲದಲ್ಲಿ ಭಾರತ ಸೋತಿತು ಸತತ ಆರನೆ ಬಾರಿ

****

ಯು.ಪಿ ಯಲ್ಲಿ ಚುನಾವಣೆ ಎದುರಾಗಿದೆಯಂತೆ
ಆನೆ ಪ್ರತಿಮೆಗೆಲ್ಲ ಪ್ಲಾಸ್ಟಿಕ್ ಹೊದಿಕೆಯಂತೆ
ಅದಕ್ಕಾಗಿ ಒಂದು ಕೋಟಿ ರೂಪಾಯಿ ಖರ್ಚಂತೆ
ವಾಜಪೇಯಿ-ಮೋದಿ ಬಿ.ಜೆ.ಪಿ ಯ ಪ್ರಚಾರಕರಂತೆ
ರಾಹುಲ್ ಗಾಂಧಿಗೆ ಪ್ರತಿಷ್ಟೆಯ ಕಣವಂತೆ
ಟೀಮ್ ಅಣ್ಣರಿಂದ ಕೈ ವಿರುದ್ದ ಪ್ರಚಾರವಂತೆ
ಮುಲಾಯಂಗೆ ಕುರ್ಚಿ ಮೇಲೆ ಭಾಳ ಆಸೆಯಂತೆ
ಮತ ಎಣಿಕೆ  ಮಾರ್ಚ್ ನಾಕರ ಬದಲಾಗಿ ಆರಿಗಂತೆ
ಮತದಾರಿಗಂತೂ ದಿನಕ್ಕೊಂದು ಆಮಿಷವಂತೆ

ಊಟ ಮುಗಿಸಿ ಅವರ ಮನೆಯಿಂದ ಹೊರಬಂದಾಗ ಕಂಡುಕೊಂಡ ಸತ್ಯ ~ ನಾನು ಸಂಯುಕ್ತಳ ಜೊತೆಗಿದ್ದರೆ ಏನನ್ನೂ ಯಾರನ್ನೂ ಮರೆಯುತ್ತೀನಿ.. ಅಮಲಳ ನೆನಪಾದರೂ ಅದು ಕ್ಷಣಿಕ.. ಸಂಯುಕ್ತಳನ್ನು ಎದುರಿಗೆ ಇಟ್ಟುಕೊಂಡು ಅವಳನ್ನು ಹತ್ತಿರ ಬಿಟ್ಟುಕೊಳ್ಳದೆ.. ಛೆ ನಾನೆಷ್ಟು ಹೆಣಗಾಡಿದೆ ಒಂದು ವಾರದಿಂದ?

ಗೇಟ್ ಸರಿಸಿ ಮನೆಯೊಳಗೇ ಕಾಲಿಡುತ್ತಿದ್ದಂತೆ ಯಾವುದೋ ಲ್ಯಾಂಡ್ ಲೈನ್ ನಂಬರಿಂದ ಕರೆ ಬಂತು. ಎರಡನೆ ರಿಂಗಿಗೆ ನಾನು ಕರೆ ಸ್ವೀಕರಿಸಿ ಹಲೋ ಅಂದೇ .. ಆ ಕಡೆಯಿಂದ - ನಾನು ಕಣೋ ಬೃಂದಾ !